| تبليغات | X |
هر سوز ایتر ، ائل سوزو ایتمز |
...دالغا خاتین اوغلو
هانی!
هانی باشیمداکی نئشه؟
هانی عؤمرومو سوندوغوم پئشه؟
هانی گؤزلریندن اوتاندیغیم فاحیشه؟
هانی پولیس لر؟
کیشی سومویوندن یوغرولموش باتوم
بئل لرینده
قادین ساچیندان هؤرولموش شاللاق
ال لرینده
هانسی دیله گلمز سریوش دیل لرینده
...منیم هئچ بیرکیمیم اولمادی
آنام اولمادی
قوینوناگیره بیلمه دیم کی
آتام اولمادی
جیسارتینی گوره بیلمه دیم کی
هئچ بیرقادینی سئومه دیم
بیریسینی سئودیم
نه یازیق
اؤزومو اونا سئودیره بیلمه دیم کی
هئچ بیر اوغلوم اولمادی
سو ایچمه دی اوووج لاریمدا
هئچ بیر قیزیم اولمادی
ساچ لارینی هؤره بیلمه دیم کی!
تانریمی فلسفه کوچه لرینده ایتیردیم
گئجه
عؤمورومو بیتیردیم بیرگئجه ،یالقیزام
بوشلوغا یئتیردیم بیرگئجه،یالقیزام
سنتده اینسانلیق وار،اینسان یوخ
مودئرنیته ده اینسان وار،اینسانلیق یوخ
هئچ بیرمکتبه چاتمادیم کی
ایمانسیزلیغا ایمان گتیردیم بیر گئجه
یالقیزام
هانی باشیمداکی نئشه؟هانی داریسقال کوچه لر؟
هانی قارانلیق گئجه لر؟
هانی عؤمرومو سوندوغوم پئشه؟
هانی گؤزلریندن اوتاندیغیم فاحیشه؟
نوشته شده در دوشنبه 1387/11/28ساعت توسط آرزو نوری .ی
|
 |
POWERED BY BLOGFA.COM |
|